ik khilaunaa TooT jaaegaa nayaa mil jaaegaa
main nahiin to koii tujh ko doosaraa mil jaaegaa
bhaagataa hoon har taraf aise havaa ke saath saath
jis tarah sach much mujhe us kaa pataa mil jaaegaa
kis tarah rokoge ashkon ko pas-e-diivaar-e-chashm
ye to paanii hai ise to raastaa mil jaaegaa
ek din to khtm hogii lafj o maanii kii talaash
ek din to mujh ko meraa muddaa mil jaaegaa
chhoD khaalii ghar ko aa baahar chalen ghar se 'adiim'
kuchh nahiin to koii cheharaa chaand saa mil jaaegaa.
Subscribe to:
Post Comments (Atom)
No comments