us ne sukuut-e-shab mein bhii apanaa payaam rakh diyaa
hijr kii raat baam par maah-e-tamaam rakh diyaa
aamad-e-dost kii naviid kuu-e-vafaa mein aam thii
maine bhii ik chiraag saa dil sar-e-shaam rakh diyaa
dekho ye mere Khvaab the dekho ye mere zaKhm hai.n
maine to sab hisaab-e-jaan bar_sar-e-aam rakh diyaa
us ne nazar nazar me.n hii aise bhale suKhan kahe
mai.n ne to us ke paa.No.n me.n saaraa kalaam rakh diyaa
shiddat-e-tishnagii me.n bhii Gairat-e-maikashii rahii
us ne jo pher lii nazar mai.n ne bhii jaam rakh diya
aur 'Faraz' chaahiiye kitanii muhabbate.n tujhe
ke maao.N ne tere naam par bachcho.n ka naam rakh diyaa
Subscribe to:
Post Comments (Atom)
No comments