Khaatir se yaa lihaaz se meh maan to gayaa
jhuuThii qasam se aap kaa imaan to gayaa
dil leke muft kahate hai kuchh kaam kaa nahii
ulaTii shikayate.n rahii ehasaan to gayaa
ab shaay-e-raaz-e-ishq go zillate.n hu_ii
lekin use jataa to diyaa, jaan to gayaa
dekhaa hai butakade me.n jo ai sheKh kuchh na kuchh
iimaan kii to ye hai ki iimaan to gayaa
Darataa huu dekh kar dil-e-be-aarazuu ko main
sun-saan ghar ye kyuu.N na ho mehamaan to gayaa
go naamaabar se Khush na huaa par hazaar shukr
mujh ko vo mere naam se pahachaan to gayaa
hosh-o-havaas-o-taab-o-tavaan "Daag" jaa chuke
ab ham bhii jaane vaale hai saamaan to gayaa
Subscribe to:
Post Comments (Atom)
No comments