ai jazbaa-e-dil gar main chaahuu har chiiz muqaabil aa jaaye
manzil ke liye do gaam chaluu aur saamane manzil aa jaaye
ai dil kii Khalish chal yuu hii sahii, chalataa to huu unakii mahafil me.n
us vaqt mujhe chau.nkaa denaa jab rang pe mahafil aa jaaye
ai rahabar-e-kaamil chalane ko tayyaar to huu par yaad rahe
us vaqt mujhe bhaTakaa denaa jab saamane ma.nzil aa jaaye
haa yaad mujhe tum kar lenaa aavaaz mujhe tum de lenaa
is raah-e-muhabbat mein koii darapaish jo mushkil aa jaaye
ab kyuu DhuunDhuu vo chashm-e-karam hone de sitam balaa-e-sitam
mai.n chaahataa huu ai jazbaa-e-Gam mushkil pas-e-mushkil aa jaaye
is jazb-e-dil ke baare mein ik mashvaraa tum se letaa huu
us vaqt mujhe kyaa laazim hai jab tujh pe meraa dil aa jaaye
ai barq-e-tajalli kyaa tuune mujhako bhii muusaa samajhaa hai
main tuur nahii jo jal jaauun jo chaahe muqaabil aa jaaye
Subscribe to:
Post Comments (Atom)
No comments