aalam hii aur thaa jo shanaasaaiyon men thaa
jo diip thaa nigaah kii parachhaaiyon men thaa
vo be-panaah khauf jo tanhaaiyon men thaa
dil kii tamaam anjuman-aaraaiyon men thaa
ik lamhaa-e-fusoon ne jalaayaa thaa jo diyaa
fir umr bhar khyaal kii raanaaiyon men thaa
ik khvaab-goon sii dhoop thii jkhmon kii aanch men
ik saae-baan saa dard kii puravaaiyon men thaa
dil ko bhii ik jaraahat-e-dil ne ataa kiyaa
ye hausalaa ke apane tamaashaaiyon men thaa
kaTataa kahaan taviil thaa raaton kaa silasilaa
sooraj merii nigaah kii sachchaaiyon men thaa
apanii galii men kyoon n kisii ko vo mil sakaa
jo etamaad baadiyaa-paimaaiyon men thaa
is ahad-e-khud-sipaas kaa poochho ho maajaraa
masaroof aap apanii pajiiraaiyon men thaa
us ke hujoor shukr bhii aasaan nahiin 'adaa'
vo jo kriib-e-jaan merii tanhaaiyon men thaa
Subscribe to:
Post Comments (Atom)
No comments