ujaalaa de charaag-e-rah-gujr aasaan nahiin hotaa
hameshaa ho sitaaraa ham-safr aasaan nahiin hotaa
jo aankhon oT hai cheharaa usii ko dekh kar jiinaa
ye sochaa thaa ke aasaan hai magar aasaan nahiin hotaa
baDe taabaan baDe raushan sitaare TooT jaate hain
sahar kii raah takanaa taa sahar aasaan nahiin hotaa
andherii kaasanii raaten yahiin se ho ke gujrengii
jalaa rakhanaa koii daag-e-jigar aasaan nahiin hotaa
kisii dard-aashnaa lamhe ke naksh-e-paa sajaa lenaa
akele ghar ko kahanaa apanaa ghar aasaan nahiin hotaa
jo Tapake kaasaa-e-dil men to aalam hii badal jaae
vo ik aansoo magar ai chashm-e-tar aasaan nahiin hotaa
gumaan to kyaa yakiin bhii vasavason kii jd men hotaa hai
samajhanaa sang-e-dar ko sang-e-dar aasaan nahiin hotaa
n bahalaavaa n samajhautaa judaaii sii judaaii hai
'adaa' socho to khush-boo kaa safr aasaan nahiin hotaa.
Subscribe to:
Post Comments (Atom)
No comments