jo charaag saare bujhaa chuke unhen intijaar kahaan rahaa
ye sukoon kaa daur-e-shadiid hai koii be-kraar kahaan rahaa
jo duaa ko haath uThaae bhii to muraad yaad n aa sakii
kisii kaaravaan kaa jo jikr thaa vo pas-e-gubaar kahaan rahaa
ye tuloo-e-roj-e-malaal hai so gilaa bhii kis se karenge ham
koii dil-rubaa koii dil-shikan koii dil-figaar kahaan rahaa
koii baat khvaab o khyaal kii jo karo to vakt kaTegaa ab
hamen mausamon ke mijaaj par koii aitabaar kahaan rahaa
hamen koo-b-koo jo lie firii kisii naksh-e-paa kii talaash thii
koii aaftaab thaa jau-fgan sar-e-rah-gujaar kahaan rahaa
magar ek dhun to lagii rahii n ye dil dukhaa n gilaa huaa
ke nigaah ko rang-e-bahaar par koii ikhtiyaar kahaan rahaa
sar-e-dasht hii rahaa tishnaa-lab jise jindagii kii talaash thii
jise jindagii kii talaash thii lab-e-jooebaar kahaan rahaa
Subscribe to:
Post Comments (Atom)
No comments