bhid mein ik ajanabii kaa saamanaa achchhaa lagaa
sab se chup kar vo kisii kaa dekhanaa achchhaa lagaa
surmai aankho.n ke niiche phuul se khilane lage
kahate kahate kuchh kisii kaa sochanaa achchhaa lagaa
baat to kuchh bhii nahin thii lekin us kaa ek dam
haath ko honthon pe rakh kar rokanaa achchhaa lagaa
chaay mein chiinii milaanaa us gha.Dii bhaayaa bahut
zer-e lab vo muskuraataa shukriyaa achchhaa lagaa
dil mei kitane ahad baa.Ndhe the bhulaane ke use
vo milaa to sab iraade to.Danaa achchhaa lagaa
beiraadaa lams kii vo san_sanii pyaarii lagii
kam tavajjo aa.Nkh kaa vo dekhanaa achchhaa lagaa
niim shab kii Khaamushii me.n bhiigatii sa.Dako.n pe kal
terii yaado.n ke jaalo me.n ghuumanaa achchhaa lagaa
us uduu-e-jaa.N ko 'Amjad' mai.n buraa kaise kahuu.N
jab bhii aayaa saamane vo bevafaa achchhaa lagaa
Subscribe to:
Post Comments (Atom)
No comments