jab virah kii vedanaa kaa hii n aanchal uTh sakaa ho,
kis lie jiivan milan ke raag viiNaa par sajaaye.
ek antarahiin smRiti men svatv ko kyonkar bhulaaoon,
kyon kusum-shRingaar, muktaahaar se nij tan sajaaoon.
kyon pratiikSaa-hetu path par vyarth nayanon ko bichhaaoon,
kyon mathit maanas punH paavan praNay-diipak jalaaye.
kis lie jiivan milan ke raag viiNaa par sajaaye॥
kaun abhinav bhenT-aashaa men sajaaye svapn abhinav,
kaun patajhar-ank men arpit kare mRidu aas-pallav.
kaun banakar harS-yaachak yon sahe nij maan-abhibhav,
kaun adharon par vyathaaen viSamayii le muskaraaye.
kis lie jiivan milan ke raag viiNaa par sajaaye॥
kaun nad kii kaalayuktaa urmiyon se khel khele,
au' viSaadaavart men astitv kii naukaa dhakele.
kaun agaNit yaatanaaen, vedanaaen vyarth jhele,
kaun nij sukh-niiD par yon dukhamayii vidyut giraaye.
kis lie jiivan milan ke raag viiNaa par sajaaye॥
Subscribe to:
Post Comments (Atom)
No comments