rah gayaa khvaab-e-dil-aaraam adhooraa kis kaa
Dhal gaii shab to khulaa hai ye dariichaa kis kaa
lamhaa lamhaa mujhe viiraan kie detaa hai
bas gayaa mere tasavvur men ye cheharaa kis kaa
aajmaaish kii ghaDii hai sar-e-maktal dekhen
jer-e-khanjar vahii rahataa hai iraadaa kis kaa
ye jo bedaar bhii hain soe hue bhii in men
shaam kis kii hai khudaa jaane saveraa kis kaa
rah-rav-e-aakhir-e-shab hain sabhii ukataae hue
kaun kab tak hai yahaan saath bharosaa kis kaa
mere kaatil ke tajassus men bhaTakane vaalo
khoon aalood hai bastii men pasiinaa kis kaa
aaiinaa-khaanaa do-aalam ko banaa kar ai ‘dil’
muntajir baiThaa hai vaaraftaa-o-shaidaa kis kaa
Subscribe to:
Post Comments (Atom)
No comments