ye khud ko dekhate rahane kee hai jo khoo mujh mein
chhupa hua hai kaheen vo shagufta-roo mujh mein
maah o nujoom ko teree jabeen se nisbat doon
ab is qadar bhee nahin aadat-e-guloo mujh mein
tagayyuraat-e-jahaan dil pe kya asar karate
hai teree ab bhee vahee shakl hoo-ba-hoo mujh mein
rafoo-garon ne ajab taba-aazamaee kee
rahee sire se na gunjaish-e-rafoo mujh mein
vo jis ke saamane meree zabaan nahin khulatee
usee ke saath to hotee hai guftugoo mujh mein
khuda kare ke use dil ka raasta mil jae
bhatak rahee hai koee chaap koo-ba-koo mujh mein
us ek zohara-jabeen ke tufail jaaree hai
tamaam zohara-jabeenon kee justujoo mujh mein
nahin pasand mujhe sher o shaeree karana
kabhee kabhaar bas uthatee hai ek hoo mujh mein
main zindagee hoon mujhe is qadar na chaah shuoor
musaafiraana iqaamat-guzeen hai too mujh mein
Show less
No comments