is vaaste daaman chaak kiya shaayad ye junoon kaam aa jae
deevaana samajh kar hee un ke honton pe mera naam aa jae
main khush hoon agar gulashan ke lie kuchh lahoo kaam aa jae
lekin mujh ko dar hai is gul-cheen pe na ilzaam aa jae
ai kaash hamaaree qismat mein aisee bhee koee shaam aa jae
ik chaand phalak par nikala ho ik chaand sar-e-shaam aa jae
may-khaana salaamat rah jae is kee to kisee ko fikr nahin
may-khvaar hain bas is khvaahish mein saaqee pe kuchh ilzaam aa jae
peene ka saleeka kuchh bhee nahin is par hai ye khvaahish hai rindon kee
jis jaam pe haq hai saakee ka haathon mein vahee jaam aa jae
is vaaste khaak-e-paravaana par shama bahaatee hai aansoo
mumakin hai vafa ke qisse mein us ka bhee kaheen naam aa jae
afsaana mukammal hai lekin afsaane ka unavaan kuchh bhee nahin
ai maut bas itanee mohalat de un ka koee paigaam aa jae
Subscribe to:
Post Comments (Atom)
No comments