jo sunata hoon kahoonga main jo kahata hoon sunoonga main
hamesha majalis-e-nutq-o-samaat mein rahoonga main
nahin hai talkh-goee shev-e-sanjeedagaan lekin
mujhe vo gaaliyaan denge to kya chup saadh loonga main
kam-az-kam ghar to apana hai agar veeraan bhee hoga
to dahaleez o dar o deevaar se baaten karoonga main
yahee ehasaas kaafee hai ke kya tha aur ab kya hoon
mujhe bilkul nahin tashveesh aage kya banoonga main
meree aankhon ka sona chaahe mittee mein bikhar jae
andheree raat teree maang mein afashaan bharoonga main
husool-e-aagahee ke vaqt kaash itanee khabar hotee
ke ye vo aag hai jis aag mein zinda jaloonga main
koee ik aadh to hoga mujhe jo raas aa jae
bisaat-e-vaqt par hain jis qadar mohare chaloonga main
agar is martaba bhee aarazoo puree nahin hogee
to is ke baad aakhir kis bharose par jiyoonga main
yahee hoga kisee din doob jaoonga samandar mein
tamannaon kee khaalee seepiyaan kab tak chunoonga main
Subscribe to:
Post Comments (Atom)
No comments