kaatii hai Gam kii raat bade ehataraam se
aksar bujhaa liyaa hai charaaGo.n ko shaam se
raushan hai apanii bazm aur is ehatamaam se
kuchh dil bhii jal rahe hai charaago ke naam se
muddat hui hai Khuun-e-tamannaa kiye magar
ab tak Tapak rahaa hai lahuu dil ke jaam se
subah-e-bahaar ham ko bulaatii rahii magar
ham khelate rahe kisii zulfo kii shaam se
har saans par hai maut kaa peharaa lagaa huaa
aahistaa ai hayaat guzar is maqaam se
kaatii tamaam umr fareb-e-bahaar me.n
kaante sameTate rahe phuulo.n ke naam se
ye aur baat hai ke "Ali" ham na sun sake
aavaz us ne dii hai hame.n har maqaam se
Subscribe to:
Post Comments (Atom)
No comments