har kisee ko yahaan mehamaan nahin karate pyaare
dil kee bastee ko biyaabaan nahin karate pyaare
bhool jao ki yahaan koee kabhee rahata tha
deed-o-dil ko pareshaan nahin karate pyaare
tum se dekhee nahin jaatee hain chhalakatee aankhen
tum kisee par koee ehasaan nahin karate pyaare
kuchh takalluf bhee zarooree hai zamaane ke lie
khud ko sab ke lie aasaan nahin karate pyaare
kaam aate hain andhere mein diye bhee aksar
har jagah dil ko farozaan nahin karate pyaare
log haathon mein namakadaan lie phirate hain
apane zakhmon ko numaayaan nahin karate pyaare
zindagee khvaabe-musalasal ka safar hai aalam
khud ko khvaabon se gurezaan nahin karate pyaare
Subscribe to:
Post Comments (Atom)
No comments