kaam aa sakii na apanii vafaaye to kyaa kare
ik bevafaa ko bhuul na jaaye to kyaa kare
mujh ko ye etaraaf duaaon mein hai asar
jaaye na arsh par jo duaaye.n to kyaa kare
[etaraaf=concurrence/agree; arsh=seventh heaven]
ik din kii baat ho to use bhuul jaaye.n ham
naazil ho roz dil pe balaaye to kyaa kare.n
[naazil=to fall upon; balaaye.n=troubles]
shab bhar to un kii yaad mein taare ginaa kiye
taare-se din ko bhii nazar aaye.n to kyaa kare.n
[shab bhar=the whole night; taare-se=like stars]
ahad-e-tarab kii yaad me.n royaa kiye bahut
ab muskuraa ke bhuul na jaaye.n to kyaa kare.n
[ahad-e-tarab=promise of good times]
ab jii me.n hai ki un ko bhulaa kar hii dekh le.n
vo baar baar yaad jo aaye.n to kyaa kare.n
tark-e-vafaa bhii jurm-e-muhabbat sahii "Akhtar"
milane lage.n vafaa kii sazaaye.n to kyaa kare.n
[tark-e-vafaa=end of faithfulness (love)]
Subscribe to:
Post Comments (Atom)
No comments