vo koi aur na thaa chand Khushk patte the

By Ruchi Sehgal Tuesday, 11 December 2018

Share Tweet Share Share Email

vo koi aur na thaa chand Khushk patte the
shajar se TuuT ke jo fasl-e-gul pe roye the


abhii abhii tumhe sochaa to kuchh na yaad aayaa
abhii abhii to ham ek-duusare se bichhade the

tumhaare baad chaman par jab ik nazar Daalii
kalii kalii mein Khizaa.N ke chiraag jalate the

tamaam umr vafaa ke gunaah_gaar rahe
ye aur baat ki ham aadami to achchhe the

shab-e-Khaamosh ko tanhaa_ii ne zabaan de dii
pahaad guunjate the dasht san_sanaate the



vo ek baar mare jin ko thaa hayaat se pyaar
jo zindagii se gurezaa the roz marate the 

naye Khayaal ab aate hai Dhal ke zahan me.n
hamaare dil mein kabhii khet lah_lahaate the



ye iratiqaa kaa chalan hai ki har zamaane mei
puraane log naye aadamii se Darate the


'Nadeem' jo bhii mulaaqaat thii adhuurii thii
ki ek chehare ke piichhe hazaar chehare the


[shab-e-Khaamosh=silent night; dasht=desert]
[Khushk=dry; chand=few; shajar=tree; fasl-e-gul=spring]
[hayaat=life; gurezaa.N=to run away from]