Zeir' se 'pesh' ho gaya hai Tuu

By Ruchi Sehgal Thursday, 13 December 2018

Share Tweet Share Share Email

'Zeir' se 'pesh' ho gaya hai Tuu
Door andesh ho gaya hai Tuu

Pehle ghaafil nahi tha Tu mujh se
Ab, kam o beish ho gaya hai Tuu

Jaan ko apni khud jalata hai
Qehr-e-Darvesh ho gaya hai Tuu

Koi apna hi ab nahi lagta
Is qadar khweish ho gaya hai Tuu

Raah mei har qadam ta'ammul hai
Wo pas-o-pesh ho gaya hai Tuu

Munakis ho rahey haiN sab tujh meiN
Aayina-kesh ho gaya hai Tuu

Gul-mizaaji teri kahaN hai 'Sukhan'
aajkal nesh ho gaya hai Tuu