āñkhoñ meñ ruup sub.h kī pahlī kiran sā hai
ahvāl jī kā zulf-e-shikan-dar-shikan sā hai
kuchh yaadgaar apni magar chhoḌ kar gai
jaatī rutoñ ka haal dilon ki lagan sā hai
āñkheñ baras gai to nikhār aur aa gayā
yādoñ kā rañg bhī to gul-o-yāsman sā hai
kis Mod par haiñ aaj ham ai rahguzar-e-nāz
ab dard ka mizaj kisi ham-suḳhan sā hai
hai ab bhī rañg rañg-e-tamanna ka pairahan
ḳhvāboñ ke saath ab bhī vahī husn-e-zan sā hai
kin manziloñ luTe haiñ mohabbat ke qāfile
insāñ zamīñ pe aaj ġharīb-ul-vatan sā hai
vo jis kā saath chhoḌ chuka naaz-e-āgahī
ab bhī talāsh-e-rah meñ vahī rāhzan sā hai
shāḳhoñ kā rañg-rūp ḳhizāñ le gai magar
andāz aaj bhī vahī arbāb-e-fan sā hai
ḳhushbū ke thāmne ko baḌhā.e haiñ haath 'adā'
dāmān-e-ārzū bhī sabā-pairahan sā hai
Subscribe to:
Post Comments (Atom)
No comments