beech bhanvar mein pahale utaara jaata hai
phir saahil se hamen pukaara jaata hai
khush hain yaar hamaaree saadaalauhee par
ham khush hain kya isamen hamaara jaata hai
pahale bhee vo chaand hamaara saathee tha
dekhen! kitanee door sitaara jaata hai
kab tak apanee palaken band rakhoge tum
kya aankhon se koee nazaara jaata hai
duniya kee aadat hai isamen hairat kya
kaanch ke ghar par patthar maara jaata hai
kab aaega tera sunahara kal aalam
is chakkar mein aaj hamaara jaata hai
Subscribe to:
Post Comments (Atom)
No comments