dil ke sun_saan jaziiro.n kii Khabar laayegaa
dard pahaluu se judaa ho ke kahaa.N jaayegaa
kaun hotaa hai kisii kaa shab-e-tanha_ii me.n
Gam-e-furqat hii Gam-e-ishq ko bahalaayegaa
[shab-e-tanhaa_ii=lonely night; Gam-e-furqat=sorrow of separation]
chaa.Nd ke pahaluu me.n dam saadh ke rotii hai kiran
aaj taaron kaa fusuu Khaak nazar aayegaa
[fusuu.N=magic]
raakh me.n aag dabii hai Gam-e-maharuumii kii
raakh ho kar bhii ye sholaa hame.n sulagaayegaa
[maharuum=deprived]
vaqt Khaamosh hai ruuThe hue yaaro.n kii tarah
kaun lau dete hue zaKhmo.n ko sahalaayegaa
dhuup ko dekh ke us jism pe pa.Datii hai jhamak
chhao.n dekhe.nge to us zulf kaa dhyaan aayegaa
zindagii chal ki zaraa maut kaa dam_Kham dekhe.n
varnaa ye jazbaa lahad tak hame.n le jaayegaa
Subscribe to:
Post Comments (Atom)
No comments