Umr safar men guzri lekin shauq e siyahat baqi hai
Koi Musafat khatm hui hai , koi musafat baqi hai
Aise bahot se raste hain jo roz pukara karte hain
Kai manazil sar karne ki ab tak chahat baqi hai
Eik sitara hath padaR kar door kahin le jata hai
Roz khala men kho jane aaj bhi aadat baqi hai
Chashm e baseerat kuchh to bata de kb wo lamhe aayenge
Jin ki khatir in aankhon men itni basarat baqi hai
Khatm kahani ho jati to neend mujhe bhi aa jati
koi fasana bhool gaya hun, koi hikayat baqi hai
Duniya ke gham fursat den to dil ke taqaze poore hon
Koocha e janaN ! teri bhi to sair o siyahat baqi hai
Shahre Tamanna! baaz aaya main tere naaz uthane se
Eik shikayat door karoon to eik shikayat baqi hai
Eik zara si umr men Aalam kahan kahan ki sair karoon
Jane mere hisse men ab kitni mohlat baqi hai
Subscribe to:
Post Comments (Atom)
No comments