vo kya gae payaam-e-safar de gae mujhe
ik jazba-e-junoon-e-asar de gae mujhe
har samt dekhatee hai jo un ke jamaal ko
vo ik nigaah-e-jalava-nagar de gae mujhe
har-chand karb-e-marg hai mahasoos har-nafas
lutf-e-hayaat-e-ishq magar de gae mujhe
tasveer-e-huzn-o-yaas bana kar chale gae
lab-ha-e-khushk o deeda-e-tar de gae mujhe
bedaar kar gae sahar-o-shaam-e-zindagee
aah-o-fugaan-e-shaam-o-sahar de gae mujhe
jamatee nahin nigaah kisee cheez par bhee ab
ik kheeragee-e-taab-e-nazar de gae mujhe
arz-e-hadees-e-shauq pe sharama ke rah gae
kitana haseen javaab magar de gae mujhe
mere sukoon-e-qalb ko le kar chale gae
aur iztiraab-e-dard-e-jigar de gae mujhe
maharoom-e-shash-jahaat nigaahon ko kar gae
bas ik nigaah-e-jaanib-e-dar de gae mujhe
akhtar vo aae aur chale bhee gae magar
ik lutf-e-iztiraab-e-asar de gae mujhe
Subscribe to:
Post Comments (Atom)
No comments