khaatir se terii yaad ko Talane nahiin dete
sach hai ki ham hii dil ko sanbhalane nahiin dete
aankhen mujhe talavon se vo malane nahiin dete
aramaan mere dil kaa nikalane nahiin dete
kis naaj se kahate hain vo jhunjhalaa ke shab-e-vasl
tum to hamen karavaT bhii badalane nahiin dete
paravaanon ne faanoos ko dekhaa to ye bole
kyon ham ko jalaate ho ki jalane nahiin dete
hairaan hoon kis tarah karoon arj-e-tamannaa
dushman ko to pahaloo se vo Talane nahiin dete
dil vo hai ki friyaad se labarej hai har vakt
ham vo hain ki kuchh munh se nikalane nahiin dete
garmii-e-mohabbat men vo hai aah se maane
pankhaa nafs-e-sard kaa jhalane nahiin dete
Subscribe to:
Post Comments (Atom)
No comments