kad tiraa sarv-e-ravaan thaa mujhe maaloom na thaa
gulashan-e-dil men ayaan thaa mujhe maaloom na thaa
dhoop men gam kii abas jii koon jalaayaa afsos
us ke saae men amaan thaa mujhe maaloom na thaa
yaar ne abaroo o mijgaan siin mujhe said kiyaa
saahib-e-tiir-o-kamaan thaa mujhe maaloom na thaa
sab jagat DhoonDh firaa yaar n paayaa lekin
dil ke goshe men nihaan thaa mujhe maaloom na thaa
khaak tere kdam-e-paak kii ai noor-e-nigaah
suramaa-e-diidaa-e-jaan thaa mujhe maaloom na thaa
main samajhataa thaa ki us yaar kaa hai naam o nishaan
yaar be-naam-o-nishaan thaa mujhe maaloom na thaa
nigah-e-shokh ne dil ek karishme men liyaa
kyaa balaa saif-e-jbaan thaa mujhe maaloom na thaa
shab-e-hijraan kii n thii taab mujhe misl-e-‘siraaj’
rookh tiraa noor-fishaan thaa mujhe maaloom na thaa
Subscribe to:
Post Comments (Atom)
No comments