ai sanam tujh birah men rotaa hoon
ashk-e-khooniin siin munh koon dhotaa hoon
bandagii men mujhe kubool karo
main tumhaaraa gulaam hotaa hoon
baarish-e-aab-e-ashk hai darakaar
daag-e-hijraan ke biij botaa hoon
bolataa hoon jo vo bulaataa hai
tan ke pinjare men us kaa totaa hoon
mat kaho mujh siin kissaa-e-frahaad
khvaab-e-shiinrii men aaj sotaa hoon
gauhar-e-ashk koon misaal-e-‘siraaj’
rishtaa-e-aah men pirotaa hoon
Subscribe to:
Post Comments (Atom)
No comments