khbar-e-tahayyur-e-ishk sun na junoon rahaa na parii rahii
na to too rahaa na to main rahaa jo rahii so be-khbarii rahii
shah-e-be-khudii ne ataa kiyaa mujhe ab libaas-e-barahanagii
na khirad kii bakhiyaa-garii rahii na junoon kii pardaa-darii rahii
chalii samt-e-gaib siin kyaa havaa ki chaman juhoor kaa jal gayaa
magar ek shaakh-e-nihaal-e-gm jise dil kaho so harii rahii
najr-e-tagaaful-e-yaar kaa gilaa kis jbaan siin bayaan karoon
ki sharaab-e-sad-kdah-e-aarajoo khm-e-dil men thii so bharii rahii
vo ajab ghaDii thii main jis ghaDii liyaa dars nuskhaa-e-ishk kaa
ki kitaab akl kii taak men joon dharii thii tyoon hii dharii rahii
tire josh-e-hairat-e-husn kaa asar is kdar siin yahaan huaa
ki na aaine men rahii jilaa na parii koon jalavaa-garii rahii
kiyaa khaak aatish-e-ishk ne dil-e-be-navaa-e-‘siraaj’ koon
na khtar rahaa na hajr rahaa magar ek be-khtarii rahii
Subscribe to:
Post Comments (Atom)
No comments