vaa rasaaii nahiin to fir kyaa hai
ye judaaii nahiin to fir kyaa hai.
ho mulaakaat to safaaii se
aur safaaii nahiin to fir kyaa hai.
dil-rubaa ko hai dil-rubaaii shart
dil-rubaaii nahiin to fir kyaa hai.
gilaa hotaa hai aashanaaii men
aashanaaii nahiin to fir kyaa hai.
allaah allaah re un buton kaa guroor
ye khudaaii nahiin to fir kyaa hai.
maut aaii to Tal nahiin sakatii
aur aaii nahiin to fir kyaa hai.
magas-e-kaab agniyaa honaa hai
be-hayaaii nahiin to fir kyaa hai.
bosaa-e-lab dil-e-shikastaa ko
momyaaii nahiin to fir kyaa hai.
nahiin rone men gar ‘zafar’ taasiir
jag-hansaaii nahiin to fir kyaa hai.
Subscribe to:
Post Comments (Atom)
No comments