kisee ke vaada-e-farda par aitabaar to hai
tuloo-e-subh-ha-e-qayaamat ka intizaar to hai
meree jagah na rahee teree bazm mein lekin
teree zabaan pe mera zikr-e-na-gavaar to hai
mata-e-dard ko dil se azeez rakhata hoon
ke ye kisee kee mohabbat kee yaad-gaar to hai
ye aur baat ke iqaraar kar saken na kabhee
meree vafa ka magar un ko aitabaar to hai
maqaam-e-dil koee manzil na ban saka na sahee
teree nigaah-e-mohabbat kee rah-guzaar to hai
vo zauq-e-deed na shauq-e-nazaara ab lekin
meree nazar ko abhee un ka intezaar to hai
agar nigaah-e-karam sheva ab nahin na sahee
meree taraf abhee chashm-e-sitam-sheaar to hai
ye aur baat naseeb-e-nazar nahin lekin
nafas nafas tere jalavon se ham-kinaar to hai
zamaana saath nahin de raha to kya akhtar
abhee jilo mein mere bakht-e-saaz-gaar to hai
Subscribe to:
Post Comments (Atom)
No comments