shareek-e-haal-e-dil-e-be-qaraar aaj bhee hai
kisee kee yaad meree gam-gusaar aaj bhee hai
mujhe to kal bhee na tha un par ikhtiyaar koee
aur un ko mujh pe vahee ikhtiyaar aaj bhee hai
teree taraf se zuhoor-e-karam nahin na sahee
tere karam ka mujhe aitabaar aaj bhee hai
vo rasm-e-shauq kahaan ab magar ye aalam hai
ke jaise dil ko tera intizaar aaj bhee hai
kisee ka naqsh-e-kaf-e-pa to ab kahaan lekin
nishaan-e-sajada sar-e-rah-guzaar aaj bhee hai
vo un ka gam ke nigaahen badal chuka akhtar
kamaal-e-shauq ka paravaradigaar aaj bhee hai
Subscribe to:
Post Comments (Atom)
No comments